SUSMA !

Saba erte yavur duşman -tam bir hasis zalım,

Bizge taşlap sahte qabat – zulum işine salım,

Evlerimizge kelip ep  qorquzmağa tırışa.

“Senin iç bir aqqıñ yoq. Sus ! “- dep sataşa.

 

Aqsızlıqların körip, içim dayanmay, qaynay.

Er bir laqaytsız olğan insan küçüni toplay.

Tek bir ayneci hayın, saçıb şube safsata,

“Olar küçlü ! Ne yapasın ?! Sus ! – dep qorqular sata.

 

Bazıları yavurlarğa teslim oldılar pek tez.

Amma aytqan yalanların çoq yahşı bile er kes.

Halqımız azap çekkenin sanki bilmeyler olar,

Padişaların ögünde tizge çökip turalar.

 

Çağıram sizni dostlar – qardaş, ağa, tatalar,

İndemeyip otursaq, qazanırlar duşmanlar.

Bir sesni mumkün ebet, küç, yalan ile boğmaq,

Bir değil – çoq bin olsaq da, olmaz susıp oturmaq.

 

                                          Nariman  CELÂL

Aralık 2021, Akmescit, Hapishane

 

<p>

</p>