ÇELEBİCİHANNIÑ MANEVİY VE SİYASİY MİRASI

1917 senesi dekabr 13 (26)-da[2] Bağçasarayda I. Qırımtatar Qurultayınıñ işi tamamlanğan edi. Şu künü milliy Ükümet erkânı seçildi (reisi – N. Çelebicihan oldı), milliy Anayasa qabul olundı, Qurultay terkibi özüni Parlament olaraq­ ilân etti ve öz reis­lerini sayladı. Ayrıca, qırımtatar halqı Qırımnıñ kelecegi meselesinde tam olaraq aq-uquq saibi olğanını bildirdi, bir de, Qırım mustaqil bir devletçilikke lâyıq olğanını ve bunıñ eñ adaletli şekli – Qırım Halq Cumhuriyeti olabilecegini ilân etti!..