QIRIM MENİM YÜREGİMDE
Riza FAZIL
Qırım menim yüregimde,
hayalımda,
añımda,
Qayda barsam,
yatsam-tursam,
gece-kündüz yadımda.
Qırım menim yüregimde,
damarımda,
qanımda,
Este, tüşte – hatırlata
özini her adımda.
Qırım menim ilk beşigim,
ilk ögrengen sözimdir.
Anam aytqan “Ay-nenni”den
quvet algan özimdir.
Qırım desem göñlüm ağlay,
muñlı közler torlana,
Asretinden içim-bavrım,
etim-tenim
Horlana!
Kündük qanım mında akıp,
mında
tamır atqanım,
Ağarmışnıñ etegine
başım qoyup
yatqanım.
Şu caplarda çapqalağan,
şu qırlarğa tırmaşqan
Menim.
Mençün ondan daa
asret Vatan
yok başqa!
Bu dünyada Ana birdir,
Vatan birdir,
can birdir.
Vatan içün damarımda
qaynap aqqan
qan birdir.
İnsan içün, ayvan içün
Ana-yurt, Vatan
birdir.
Vatan içün kureşkenge
Şeref biñdir!
Şan biñdir!
Qırım menim imanımda,
hayalımda,
añımda.
Qırım menim yüregimde,
damarımda,
qanımda!
1990 s.