TARİHNİ BİLMEĞENNİÑ KELECEĞİ ŞÜBELİ

TARİHNİ BİLMEĞENNİÑ KELECEĞİ ŞÜBELİ^*

 

Server MUSTAFAYEV^**

“Tarihni bilmegenniñ – keleceği şubeli, ğayıp”. Bu sözler ve buna oşağan atalar sözleri çoq halqlarda bar.

Assalamu aleyküm ve Rahmatullahi ve barâkâtuhu, büyük Musülman qorantasınıñ, cesur yürek, boysunmağan Qırımtatar halqım.

Mektupnıñ başında aytqanım kibi, balalıqtan başlap çoq kere aynı sözler, fikirler, em evde qartlarnıñ, analarnıñ ağzılarından eşittik, em mektep, kitaplardan… Elbet, siyaset ve tarih bu sözlerge daima öz deñişme manalarını kirsete, lâkin kerçek ve haq manasını, aqılı yerinde olğan insan er vaqit doğru körer añlar.

2014 senesinde Qırımğa yañı işğalciler ve zalimler keldi. Soñra 2018 senesi, menim evimde (qorantamda) keçken tentüv ve neticesinde apishane ve 2019 senesinde ise Rostov-Na-Don şeerine arbiyler mahkemesine haqsız, zemaneviy sürgünlik. Butün bu vaqialar, kerçektende şahsiy olaraq maña, menim qorantama, soy-tanışlarıma, balalıqtan eşitken tarihten ikâyelerni kene köstere, közlerimiz kene köre ve tekrarlanğan haqsızlıqqa, basqığa pek yarıq açıqlağanını añlaymız

Soñki 6 sene devamında olğan vaqialar butün dunyağa açıqça kösterdi:

• Dünya siyasetiniñ usûlları, añlaşmalarınıñ netiçesiz ve zayıf olğanını,
• Qırımtatar halqnıñ boysunmağan durumını (satqınlarnı saymayıq),
• Rus devletniñ asırlar devamında halqımazğa yapqanların bugün de kösterğenin,
• Dinimizge, örf-adet ve tarihimizge haqsızlıq ve zulümi (dinge yol tek satqın muftiyattan köstere)
• Abidelerimizni ğayıp ete,
• faal yaşlarnı, evelki kibi, apiske ala, öldüre (Reşat Ametov), ğayıp ete (Ervin İbragimov ve digerleni),
• Tarihimizni ise yañıdan, yalan etip, yaza,
• Til, medeniyet ve diger hayat deñişmelerniñ sayısı, lafı bitmez.
• Halqımıznı “satqın” lağabından (1944 s.), “terrorist”, “ekstremist” lağabınen (2014 s.) adlandırdı…

Amma dünyadan ğayrı, ve birinciden, bu şeylerni bizler özümiz körip añlamağa kerekmiz. Soñra ise, elbette, buna qarşı küreş areketlerimizni tizmek ve ne qadar sozulsa da bugünki imtianlar, boysunmayıp, ellerimizni tüşürmeyip, eslerimizni ve yüreklerimizni yerinde tutıp, temiz niyet, qattı sabır, küçlü ahlák ve din-iman iş doğru tevekkülnen bu yañı tarih saifelerini ecdatlarımızğa yazıp, yaşap qaldırayıq.

Ep bir iş, areketni başlağanda, yapqanda dinimiz ve sevimli Peyğamberimiz (s.a.v) ögretkeni kibi, temelini özegeni körip, añlamağa ve eñ güzel (elâl) şekilde yapmamız lázım. Elbet, er zamannıñ öz farqlı tabiatı, durumı bar. Lákin bugünki vaziyetlimizniñ tamırları uzaqta qalğan tarihimizden başlay. Bizim baqışımız andan başlamasa, menimce, bugünki vaqialarnı zaif añlarıq. Biriñiz, belki, matem vaqialarını ve 1944 senesindeki sürgünlikni tüşünip. Amma 19 aprel (8 aprel eski taqvim) 1783 senesindeki II.Yekaterina’nın  yapqan işğali, Şagin Gereyniñ satqınlığı – bu ise büyük ve birinci basqı, zulümler Qırım toprağımızğa oldı.

Ondan ğayrı, elbet, daa çoq türlü vaqialar tarihte olıp keçti (cenkler, açlıqlar, Sovetler deviri ve diger), lákin Rus devletiniñ halq-dinimizge qarşı siyasetini köstergen ameller – bu 1783-1944-2014 senelerinde olgan basqılardır. Bu seneleri olgan haqsızlıq, yalan, satqınlıq ve diger aram, çirkin areketlerini daa güzel añladım, ögrenmege istedim ve diqqatıñıznı almağa kerek dep, saydım.

İnsan, tabiatı buyunca, özüni, öz qorantasınıñ, yaqınlarınıñ raatlığını qorçalaması müim. Bugünki dünya ve devletlerniñ siyaseti bu insannıñ tabiatına ep yardım ete. Çevri-çetimizde olğan haqsız zulüm, işğal ve cenklerden suvundıra. “Onların episi çet, digerlerniñ zorluğı, cenki” – dep. Tasil programmaları ve siyaset tarihni çoq yalannen toldurıp, kerçekten olğan vaqialarını tapmasını, bilmesini qıyın etti (amma istegen mutlaqqa er zaman, er şeyni tapa bile).

Ondan ğayrı, insan tek yahşılıqnı tüşünmek istep, tarihni ve tarihteki olğan dere, örnek hata ögrenilmey. “Bir daa öyle şeyler olmaz”, dep. Eger mübarek Quran’ı Kerimni oqusaq ve insanlar halqlar – tabiat, tarihını Adem (aleyhi selam) vaqıtından başlap ögrensek, körermiz tarih ve haqsız, zulüm ve insanlıqqa zaif ameller, basqılar, laflar tekrarlanıp daima devam ete. Rabbimiz ise buna çoq qıymet kesip, dikkatımıznı ala. Amma itibar etken adam pek az… (Allah’a şükürler olsun, dinimizni qorçalağan, ğayıp ettirmegen bita-qartbabalarımızğa ve bugün camilerni toldurğan, dinge yaqınlaşqan ve kün-künden sayısı artqan insanlarımızğa.)

Halqımıznıñ kerçektende müim olğan açıqlağanım tarihiy vaqialarnı, ondan çıqqan derslerni ögrenip, bilip qullanmağa ve keçken hatalarını açıqlap tekrarlamamaq mutlaq lazım. Bu mektubimde temelinden olarnı açıqlamağa maqsadım yoq ve sizni uzun sözümnen çekiştirmek istemeyim. Sizin diqqatıñıznı bu senelerğe ve tarihteki derslerge çekmek istedim. Tavsilatlı malûmatnı bugün tapmanın iç bir zorluğı yoq, tek istek kerek!  Er bir işte ya da teşebbüste olğanı kibi.

Men ise, qısqadan olsun dep, bu tarihten koögen añlağan ders, neticelerni aqqında aytmaq ister edim:

• Zalimlerniñ, işğalcilerniñ basqıları, niyetleri aynı ve tekrarlanıp devam ete,
• Halqnı boysundırmaq niyetinen , cesur yürekli eñ bilgili, qaraman insanlarımıznı, faalcilerimizni ğayıp ete, öldüre, uydurma cinaiy işler açıp apiske ala,
• Evelleri epimizni “satqın” dep adlandırdı, bugün ise “terrorist”, “ekstremist” dep, lağaplar qoya,
• Din, tarih, til, medeniyetni deñiştire, yalan uydura ve özüne kerekli şekiline aylandıra,
• Satqınlıqnı mod etip, halq arasında ep arttıra,
• Bir beden, bir vücud birligimizni yoq etmek niyetinde – aramızda fitne peyda ete, destek yolunı qapata, qomşu-soyu munasebetlerini suvuttıra.

Bunlar, elbet, episi degil, amma olarnıñ esası. Bunı añlap, doğru baqsaq, közümiz çoq şeyni körecek, qulağımız eşitecek. Tarih bizge bir ders olsun, zamanımız qaramanlarnen tolsun, hayatımız ğururlandırğan, ornek şekilde keçsin.

İslam dini, onıñ dersi bizim halqnı peyda etti; devamında tarihimizde olğan sıqıntı, imtianlarını keçmege küç berdi; bugün ise, boysunmayıp, ğayıp olmamağa – aynı tek muqaddes dinimiz yüreklerimizge raatlıq ve zafer yolunı berecek.

Keleyatqan mübarek on bir aynıñ sultanı – Ramazan ayı, hayırlı ve bereketli olsun. Güzel amel, dülber sabır, yüksek insafqa qoranta ve evlerini toldursın. Hastalıqlardan Rabbimiz sizni ve butün dünya müsülman ve insanlarnı saqlasın. Zalimlerni yoq etsin, satqınlıqqa ve fitnege yol bermesin. Bizler asret, sürgün olğanımızğa – soñki Ramazan olsun. Tez vaqıtta topraqlarımız işğalcilerden, basqından boşasın, qorantalar birleşsin, yürekler imanğa, betlerimiz din nuruna tolsun. Amin. Keçmişler Allah’ın rahmetinde olsun.

Sevgi ve sayğılarımnen Server Rüstem oğlu Mustafayev Bahçisaraylı

#freeMustafayevServer

* Kiril harfleriyle Qırımtatarca yazılan bu açık mektup, Kırım Dayanışması’nın (Krımskaya Solidarnost)

https://www.facebook.com/403544516679677/posts/1110396542661134/?d=n

adresindeki Facebook sayfasında 19 Nisan 2020 tarihinde yayınlanmıştır. Latin harflerine Özge Kandemir Temizel tarafından aktarılmıştır.

** Rusya’nın Vatan Kırım’ı işgal etmesinden sonra Kırım Tatarlarına yapılan baskınları haber verme ve hapse atılan aileler ile dayanışma amacıyla kurulan Kırım Dayanışması’nın koordinatörü. Server Mustafayev, 21 Mayıs 2018 günü Bahçesaray’daki evine işgalci Rusya zorbalarının yaptığı baskında tutuklanmıştı. “Hizbut Tahrir” davasına dahil edilerek illegal olarak Rostov’daki özel askeri cezaevinde götürülmüş olup orada yargılanması devam etmektedir. Server Mustafayev, Akmescit hapishanesinde iken, işgalcilerin tutukladığı, şeker hastası ve ayağı protezli, özel bakım isteyen Edem Bekirov ile gönüllü olarak aynı hücrede kalmış ve bakımına yardımcı olmuştu. Server Mustafayev evli ve 4 çocuk babasıdır.